أسامة المعباء

سبحان ربي بخلقه يخلق من العود عودين
به عود مردف يهودي وعود كرسي لختمه

واصابع اليد دايم بالطول ماقد تساوين
والله هو يخلق الشي وفيه عبره وحكمه

به ناس بتبيع ذممها ياقوم من اجل الفين
وناس بتراقب الله وتخشاه في كل كلمه

وبه ناس ماتلقى فيها مبدا ولا عز او دين
وناس فيها تلاقي غيره ونخوه وحشمه

وناس تحيك المكائد والشر مابينها البين
وبالقيل والقال تجلس غيبه نميمه بفمه

وناس وقت السلايم بيقولوا ابشر ولاحين
بتجيك ايام غبراء بيقلبوا الرقم خدمه

وناس اجواد ونعم فيهم رجال ن ميامين
وقت الظروف العصيبه بيجيك عونه ودعمه

وبه ناس تحمل طبايع نكرا واسلوبها شين
ماعندها ذوق وإخلاق حتى لأهله وقومه

وناس فيها لباقة واسلوبها عندنا زين
دوم البشاشه بوجه وتجمله خير بسمه

الناس اشكال واجناس وأنواع ماعد يُعدين
ماحد كما احد ولاحد طالع لخاله وعمه

ما يستوون الاوادم لوكانوا ياذاك اخّين
مااخ بيجي كما اخوه وقدهو من ابوه وامه

خضنا تجارب عديده ودروس لينا يفيدين
والكل من ذي المعيشه قد شل نصبه وقسمه

قال المثل ذي بيوفي بيضل مبلي في الدين
والصح من كان وافي بيعيش وهو بقمة

عيش بالكرامة وبالعز لو ماهو الا ليومين
ولا حيــاة المــذله اءبـد وانتــه بغمــه

ولو معك الف صاحب اختار بس منهم اثنين
ذي يدافع عليك بغيابك وذي يزهمك بالملمه

#إتحاد_الشعراء_والمنشدين

في الثلاثاء 20 يونيو-حزيران 2023 09:18:07 م