الــيـوم يــا نهـر الـفـرات اتـكـلـّم
عـن كــلّ ذرّة من رمـــاد الـعتــرة

لا ويــن شلّيـت الإمـــام الأعظم
مـا ورّطــك والطـّف كانت عـبـرة

يا نهـر جـوّب عن سؤالي واسلـَم
من وين جالك عند حمله قُدره

وكُــلّ ذرّة زيــدية حيد اصـيــم
وكلّ حيد اصيم مثيل الجمرة!!

يا ليتك اتوقّفت قبل المخــتـَم
ذي شـلــّت الكوفة نصيفة وزره

ياليتك اتبخّرت قبل المــأتـــم
ذي عاشه الواقـع لآخـر عـُمره

الكون غارق في دجى ليل اظلم
بعد الجرايم ذي تـسوّد دهره!!

نفس البلا والكرب عادت والدم
دمّ الـنـبـوّة ذي تأكــد طــُهــره!!

زيد ابن زين العابدين المـُلـهم
وابن الحسين اللي تقطّع نحره

يُقتل ويُصلَب بيد كمّن ملجـَم
وبيد كمّن جوشني بالخـبـرة!!

زيد الّـذي وجهه مثيل البلسم
يشفي جراحات البشر من نظرة

زيــد المحالـِف للكتـاب المُحكم
دون الهـُدى ماشي يعبـّي صدره

ويش السبب لاما الدعيّ استحكم
وجــا يواجـه قلـّته بالكــثــرة !!

وكلّ واحد في الخلايـق دعمـم
كنــّه صَلـَب انسان معلـن كــفـره

قلنـا لكـم والكــل واجب يفهـم
انّ السقــيـفة راس كمـّن نـثرة!!

وما غرضنــا يـا بـشر نــتلـــوّم
فهم الحقايق فــايدتهــا بكـرة

من السقيفة لا يزيد الأشرم
ذي هدّ بيت الله صخرة صخرة

وذي كفـر والكون كـلــّه يـعلـم
والشاهد ابياتـه وخسّة شعره

الى هشـام اللي تيهوَد واجرَم
واصبح يهودي بالولاء والفطرة

لا عند بن سلمان ذي ما سلـّم
ولا سلِم مُسلـِم ولد في عصره

عدوانهم وحصارهم لا يرحـم
وشعبنا مصلوب داخل قـهــره !!

بـ زيد نشعر كلّ ليلـة نــُظلــَم
ولا مـُنـاصـر بـان فينـا نـصـره!!

الواجـب العالم بكلـّه ينـــضــم
ويصير زيدي في طريق الثورة

ثورة على الطغيان جلّاب الهم
والخزي والذلـّة وعيش العسرة

ثـورة وكلّ الخـلـق فيـهــا تنهـم
ماهي على الشعب اليماني نُدرة

لا زيد في صعدة درس واتعلّم
ولا النـّبي مولود داخل مطـرة!!

يا مـن لجيفـارا مدح ملئ الفم
ومنهــج الثوّار يشغل فـــكــره!!

ثــورات آل البـيـت أكبر معـلـَم
من سار فيها الـلـّه يرفع قدره

ومنبـع الاعــلام مـثـل الزمزم
و دربهم ساني ولابه حفرة !!

يامن خذلهم وانحرف واتعيدم
با ينتهـي والـلـه يكسر ظهره!!

باعوا عيال المصطفى بالدرهم
والبعض عاده دَين ما ادّوا سعره

لاما اصبح الاسلام مثل الخيتم
على يد امريكا يعيش الحسرة !!

واليوم تلعب بالعروبة كـيـرم
واللـعـب بالمكشوف مابه شفـرة

صار المـُقدَّس لليهودي مغنم
القدس ملكه والقبب والصخرة

وحول مكـّة الف مرقص ينغم
يفسد ويمنع حجــّها والعــُمرة

والـلـّه وحده بالعواقب يعـلـم
لو يجلس الإسلام يلزم صبره

هشام بن سلمان طعمه والشّم
والكنغرس في قصرهم والحجرة

واحنا حلفنا يابن زيد الضيغم
معاك ما مـؤمن تـراجع شعـرة!!

الكل بالتسليم بعـدك مــُلــزم
واصل بثورة زيد واشـدد أزره!!

خـلّ البنود الزيدية تتـرجم
لو با نردّ أمّ الممالك قـــفــرة

#ثورة_زيد

#إتحاد_الشعراء_والمنشدين