يالله لنا فيك الرجاء وانت الحــكم
تصلح جمـــــيع امــــــورنا وتحـــلها

الامر لك ياخالق الشـي مـــــن عدم
لك نبتهل تلطــــــــف بغــــزه واهلها

صمت العـروبه طال والصف انقسم
وامة محمــــــــــــد شت ربي شملها
 
القدس يتنفس مـــــن اعمـاقه ندم
والامه العمياء تراخــــــــــــي حبلها

مدري متى تسمـــــع نداء المعتصم
وتحررفلسطين مـــــــــــــن محتلّها

يابعض حكـام العـــــرب وين الهمم
وين الشهامــــــه ذي خلقتو لاجـلها

تفريطكم فـــي القدس اكبر ذنبكم
وافواهكم بالصمت محكــــم قفلها

وين الرجـوله والمبــــــادئ والقيـم
ذي باعها الاعراب واخفـــــو اصلها

المسجد الاقصـــــى يدنسه العجـم
وشعوب الامه غارقه فـــــي وحلها

والــــدم يسفك والمنــــــازل تنهدم
واحوال غــــزه في وضع يرثى لها

والام تذرف دمعها حــــــــزن و الم
تحت الدمــــــار تلملم اشلاء طفلها

ياكل مــــن طبع مــــع شــــر الامم
ويشارك اســـــــــرائيل اخبث فعلها

لا تسكتو ان كان فيكــــــم محترم
دام القضيـه فــــــــــي يديكم حلها

مابعد الاقصـى الا المـدينه والحرم
وارجع تخلـوها مثـــــــــل ذي قبلها

قلنا لكم لا تأمنو غـــــــــــدر العجم
اليوم فـي غزه وبكـــــــــــره حولها

ذلحين يا وقفــــه على ساق وقدم
نحسم قضيتنا ونلحــــــــــق حثلها

والا افصلو سلك العــــــروبه منكم
يلعن عروبتكـــــــــــم ويلعن شكلها

اما اليمن قـــــــــد قال قايده العلم
هذا القضيه هــــــــــي لنا واحنا لها

حرام ما نخضـــــــــــع لعباد الصنم
ولانوطــــــــي روســـــــــــنا ونذلها

في البحـر ركبنا الســواري والدعم
والبحريه ماقصـــــــــرت في بذلها

سفن العــــدو يسجلــــــوها بالرقم
شي قد وصل والقادم اللـــــه شلها

كل شي ولا تعبــــــــر سفينة متهم
سوى بوارج حــــــــــرب والا مثلها

ممنوع يجزع من بحـــرنا شي لهم
حتى تضع كـــــــــل البواخـر حملها

ابن اليهود الواجب انه قــــــد فهم
ان حربنا ماقــــــــــــد قرعنا طبلها

هذه بداية كيـــــف عاد اما الحسم
حرام لا يتعوذو مــــــــــــــن هولها

ياما نصحناهـــــــــم وكم قلنا وكم
مافهمت اسرائيل وش قلــــــنا لها

قولو لها يوم النقأ رعـــــــــده زهم
ماللنجاسه حـــــــــــــــل الا غسلها

شعب اليمن لمساندة غـــــزه عـزم
لاقال ابوجبــــــــــــريل كلمة قالها

على كتاب اللــــــــــــه ادينا القسم
مانترك اســــــــــرائيل ترعـى ابلها

ماحنا بحاجة راي تصعيــــد القمم
ذي حلت اشيـــــــــــاء ربنا ماحلها

لوكان فيهم خيـــــر ماعاشو خدم
ولاعــــرفنا ذالبـــــــــــــــلاوي كلها

لكن بعون الله نبطل سحــــــــرهم
والصهينه قـــــــــــد حل ربي قتلها

والنصر وعد اللــه والسيـف الحكم
والمعركه ذي با تحقـق عــــــــــدلها

مابعد ذالتهـــــديد الا نحتــــــــــزم
والطـــــــــارفه للذيب اذا جـا شلها

واليوم يوم الفصـل والامر احتسم
ياجاءت اسـرائيل او جيـــــــــنالها

#إتحاد_الشعراء_والمنشدين
#طوفان_الاقصى

#لستم_وحدكم